Xeografía. Movementos migratorios
Definicións e conceptos teóricos
Índice
Migración
O coñecemento do volume dunha determinada poboación e da súa composición nun momento dado proporciónanos unha información estática; é dicir, unha instantánea da mesma. Pero a poboación está en continua evolución, orixinada por unha serie de factores de cambio que inciden sobre ela: nacementos, defuncións e movementos migratorios.
Un movemento migratorio ou migración é o cambio de residencia dunha persoa.
Os movementos migratorios pódense clasificar en externos e internos segundo a orixe e destino do cambio de residencia.
Emigración
Para un determinado ámbito xeográfico as emigracións son aquelas migracións que teñen orixe nese ámbito e destino fóra do mesmo.
Inmigración
Para un ámbito xeográfico determinado as inmigracións son aquelas migracións con destino nese ámbito e orixe fóra do mesmo. Ao igual que as emigracións, as inmigracións pódense clasificar en internas e externas.
Migración interna
Para un ámbito xeográfico determinado, as migracións internas son aquelas que teñen orixe e destino nese ámbito xeográfico. Por exemplo, para Galicia as migracións internas son aquelas que se producen entre os diferentes concellos da nosa comunidade.
Migración externa
Para un determinado ámbito xeográfico, as migracións externas son as que teñen orixe ou destino fóra deste ámbito xeográfico. Para Galicia, se a orixe (no caso das inmigracións) ou o destino (no caso das emigracións) se sitúan fóra de Galicia estaremos falando de movementos migratorios externos.
Exemplo: o Instituto Nacional de Estadística elabora a "Estadística de Variaciones Residenciales" que permite coñecer os fluxos migratorios que se producen entre os diferentes municipios de España e entre os municipios españois e o estranxeiro.
Para o ano 2006 esta estatística facilítanos a seguinte información:
|
|
|||||||||||||||||||||||||||||||||||||||||||
Fonte: Instituto Nacional de Estadística. Estadística de Variaciones Residenciales
No ano 2006 rexistráronse en Galicia un total de 88.770 emigracións, das cales 63.489 tiveron como orixe un concello de Galicia e destino outro concello distinto da mesma comunidade autónoma. As 25.281 emigracións restantes tiveron como orixe un concello galego e destino fóra de Galicia (21.372 marcharon a outra comunidade autónoma e 3.909 ao estranxeiro).
Por outra banda, en 2006, o total de inmigracións ascendeu a 106.371, 63.489 procedentes doutro municipio galego e 42.882 de fóra de Galicia.
Bótalle un vistazo aos datos máis actuais que atoparás no seguinte ligazón: migracións
Saldo migratorio
O saldo migratorio calcúlase como a diferenza entre o total de inmigrantes e o total de emigrantes. Se é positivo indica que as entradas de poboación superan ás saídas, e o contrario se é negativo.
Saldo migratorio interno
Calcúlase como a diferenza entre a inmigración interna e a emigración interna.
Saldo migratorio externo
Calcúlase como a diferenza entre a inmigración externa e a emigración externa.
Exemplo: Para os datos anteriores de 2006 podemos calcular o saldo migratorio da seguinte maneira:
- Saldo migratorio = inmigracións - emigracións = 106.371 - 88.770 = 17.601
- Saldo migratorio interno = inmigracións internas - emigracións internas = 63.489 - 63.489 = 0
- Saldo migratorio externo = inmigracións externas - emigracións externas = 42.882 - 25.281 = 17.601
Como se pode observar, para o total de Galicia, o saldo migratorio interno é cero. Isto é lóxico, pois se se considera como ámbito xeográfico de referencia o total de Galicia, o número de inmigracións internas ten que coincidir co de emigracións internas, pois as dúas teñen como orixe e destino a comunidade autónoma de Galicia.
No tocante ao saldo migratorio externo este é positivo, o que indica que no ano 2006 Galicia recibiu máis persoas (procedentes do resto de España e do estranxeiro), das que se foron.
Bótalle un vistazo aos datos máis actuais que atoparás no seguinte ligazón: migracións
Inmigración de retorno
As inmigracións de retorno son os movementos con destino no concello de nacemento.
Exemplo: na seguinte táboa móstranse os datos de inmigracións de retorno segundo o tipo de inmigración, para Galicia no ano 2006:
| Inmigración de retorno | ||
| Total | 18.939 | |
| Inmigracións internas | 12.104 | |
| Da mesma provincia | 10.143 | |
| Doutra provincia de Galicia | 1.961 | |
| Inmigracións externas | 6.834 | |
| Doutra CCAA | 4.715 | |
| Do estranxeiro | 2.119 | |
Fonte: Instituto Nacional de Estadística. Estadística de Variaciones Residenciales
Bótalle un vistazo aos datos máis actuais que atoparás no seguinte ligazón:inmigración de retorno