Definicións

Nacementos, matrimonios e defuncións

Defunción

O concepto estatístico de defunción utilizado tradicionalmente en España comprendía a todos os falecidos con máis de 24 horas de vida. A partir de 1975 o concepto ampliouse coa incorporación dos nacidos con vida falecidos durante as primeiras 24 horas. Con este cambio adóptase o criterio recomendado polos organismos internacionais.


Intervalo interxenésico

É o período de tempo que hai entre dous nacementos consecutivos. Este intervalo calcúlase tanto para os nacidos vivos dentro como fóra do matrimonio, sempre que haxa un nacido vivo anterior.


Intervalo protoxenésico

É o período de tempo comprendido entre a data do matrimonio e a data de nacemento do primeiro fillo nacido vivo.


Matrimonio

O concepto estatístico de matrimonio empregado é o do matrimonio inscrito no Rexistro Civil.


Morte fetal tardía

A efectos estatísticos, considérase como morte fetal tardía o feto morto con seis ou máis meses de xestación.


Nacemento

Aínda que o Código Civil no seu artigo 30 di "só se computará nacido o feto que tivera figura humana e vivira vintecatro horas enteiramente desprendido do seno materno", no campo demográfico o concepto de nacemento identifícase co concepto biolóxico de nacido con vida.


Orde de nacemento

É o lugar que ocupa un nacido vivo dentro da secuencia cronolóxica do total de fillos dunha muller.


Parto

Coincide co concepto médico-biolóxico, é dicir, expulsión ou extracción do claustro materno do produto da concepción viable; polo tanto queda excluído o aborto ou expulsión do feto non viable. O concepto de parto inclúe tanto os nacementos como as mortes fetais tardías.


Saldo vexetativo

É a diferenza existente entre os nacementos e as defuncións ocorridas durante un período de tempo definido.


Compartir: